Флукона-Денк 150мг №1 Капсул

Флукона-Денк 150 нь мөөгөнцрийн эсрэг эмийн бүлэгт хамаарах бөгөөд үйлчлэгч бодис нь флуконазол юм. Флукона-Денк 150 бэлдмэлийг насанд хүрэгчдэд мөөгөнцрөөр үүсгэгдсэн халдварын эмчилгээнд хэрэглэнэ. Мөөгөнцрийн халдварын зонхилон үүсгэгч нь Candida гэж нэрлэгддэг хөрөнгөний мөөгөнцөр юм.

Эмчлэгч эмч танд уг бэлдмэлийг эр бэлэг эрхтэн болон үтрээний халдвар, бэлэг эрхтний мөөгөнцрийн үед хэрэглүүлнэ.

• Үйлчлэгч бодис нь флуконазол. Хатуу бүрээст нэг шахмалд 150 мг флуконазол агуулагдана.
  
• Бусад бодис: Лактозын моногидрат, бичил талст целлюлоза, урьдчилан желатинжуулсан эрдэнэ шишийн цардуул, коллоид кремнийн хоёрч исэл, магнийн стеарат [ургамлын], натрийн лаурилсульфат, желатин, титанийн хоёрч исэл, хинолины шар, шар будагч бодис.

Бусад эмийн бэлдмэлийн нэгэн адилаар энэхүү бэлдмэлийг хэрэглэхэд гаж нөлөө илэрч болзошгүй ч энэ нь бүх хүмүүст илэрдэггүй. 

Цөөн хүмүүст харшлын урвал ажиглагдах боловч хүнд явцтай харшлын урвал ховор тохиолдоно. Хэрэв танд энэхүү эм хэрэглэх зааварт  тэмдэглэгдсэн  болон  тэмдэглэгдээгүй ямар нэг гаж нөлөө илэрвэл эмчлэгч эмч, эм зүйчид мэдэгдэнэ үү.

Доорх гаж нөлөө илэрсэн тохиолдолд эмчид яаралтай хандана уу.

• гэнэт амьсгал хяхтнаж, амьсгал хүндрэлтэй болох,  цээж бачуурах
• уруул, нүүр, зовхи хавагнах
• биеийн бүх хэсгээр  улайж загатнах, загатнаат улаан толбо илрэх
• арьсны тууралт
• цэврүүт тууралт илрэх зэрэг хүнд явцтай арьсны урвал илрэх (энэ нь ам болон хэлэнд нөлөөлнө)
  Флуконазол (Флуконазол-Денк 150-ийн идэвхтэй үйлчлэгч бодис) элгэнд нөлөөлж болно. Элэгний талаас дараах шинж тэмдэг илрэнэ:
• ядрах
• хоолонд дургүй болох
• бөөлжих
• арьс болон нүдний цагаан шарлах зэрэг хамаарна.

Дараах шинж тэмдгийн аль нэг нь илэрвэл Флукона-Денк 150 бэлдмэлийн эмчилгээг зогсоож, эмчид яаралтай хандана уу:

Тархмал тууралт, өндөр халуурах болон тунгалгийн булчирхайнууд томрох

(DRESS хам шинж эсвэл эмийн хэт мэдрэгшлийн хам шинж)

Бусад гаж нөлөө:

Нэмж дурдахад дараах гаж нөлөөний аль нэг нь хүндрэх эсвэл уг эмийн зааврын жагсаалтад ороогүй гаж нөлөө илэрсэн бол эмч, эм зүйчдээ мэдэгдэнэ үү.

Олонтаа илрэх гаж нөлөө (10 хүнд 1 хүртэлх тохиолдол илэрч болзошгүй):

• толгой өвдөх
• ходоод хямрах, суулгах, зовиурлах, бөөлжих
• цусан дахь элэгний үйл ажиллагааны үзүүлэлт ихсэх
• туурах

Хааяа илрэх гаж нөлөө (100 хүнд  1 хүртэлх  тохиолдол илэрч болзошгүй):

• цусны улаан эсийн тоо цөөрч улмаар арьс цонхийх ба ядарч сульдах, амьсгаадах
• хоолонд дургүй болох
• нойргүйдэх ба нойрмоглох
• татах, толгой эргэх, эргэлдэх мэт мэдрэмж төрөх, хатгаж буй мэдрэмж төрөх, бадайрч мэдээгүй болох, амтлах мэдрэхүй өөрчлөгдөх.
• өтгөн хатах, хоол боловсруулах үйл ажиллагаа хямрах, доошоо хий гарах, ам хатах
• булчингийн өвдөлт
• элэг гэмтэх ба арьс, нүд шарлах (шарлалт)
• гөвдрүү, чонон хөрвөс, загатнаа, их хэмжээгээр хөлрөх
• ядрах, биеийн ерөнхий байдал таагүй байх, халуурах

Ховор  илрэх гаж нөлөө (1000 хүнд  1 хүртэлх  тохиолдол илэрч болзошгүй):

• халдвараас хамгаалах үүрэгтэй цусны цагаан эс болон цус тогтоох үүрэгтэй цусны ялтас эсийн тоо хэвийн хэмжээнээс багасах.
• цусны ялтас эс цөөрөх болон бусад эсийн тоо өөрчлөгдсөний улмаас арьсны өнгө улаан, улаан хөх өнгөтэй болох
• цусны химийн шинж өөрчлөгдөх (цусан дахь холестерол ба тосны хэмжээ ихсэх)
• цусан дахь калийн хэмжээ буурах
• салганах
• зүрхний цахилгаан бичлэгт өөрчлөлт илрэх, зүрхний цохилтын хурд болон хэмнэл өөрчлөгдөх
• элэгний дутагдал
• харшлын урвал (зарим үед хүнд явцтай), арьсны цэврүүт тархмал тууралт, арьс гуужих, хүнд явцтай арьсны урвал, уруул нүүр хавагнах
• үс унах

Давтамж тодорхойгүй ч илрэх боломжтой гаж нөлөө (байгаа тоон мэдээллээс тооцох боломжгүй):

• загатнах, халуурах, булчирхай хавдах зэрэг арьсны хэт мэдрэгших урвал, цусны нэгэн төрлийн цагаан эсийн тоо олшрох (эозинофили), дотор эрхтний үрэвсэл (элэг, уушги, зүрх, бөөр, бүдүүн гэдэс) (эозинофили ба системийн хамшинж бүхий хэт мэдрэгшлийн урвал, DRESS).
  
• Бэлдмэлийн найрлага дахь шар өнгийн бодис нь харшлын урвал үүсгэж болзошгүй.

Гаж нөлөөг  мэдээлэх

Хэрэв танд энэхүү зааварт тэмдэглэгдсэн  ямар нэг гаж нөлөө илэрвэл эмч, эм зүйчид мэдэгдэнэ үү. Үүнд эмийн зааварт тэмдэглэгдээгүй гаж нөлөө хамаарна. Илэрсэн гаж нөлөөг мэдээлэх нь энэ бэлдмэлийн аюулгүй байдлын мэдээллийг сайжруулахад тус болох юм.

Бэлдмэлийг эмчлэгч эмчийн зааврыг нарийн баримтлан хэрэглэнэ. Хэрэв ойлгомжгүй зүйл байвал эмчлэгч эмч болон эм зүйчээс дахин лавлана уу.

Бүрээст шахмалыг бүтнээр нь аяга усаар даруулж залгиж ууна.

Насанд хүрэгчдэд

Нэг удаагийн тун 150 мг

Өндөр настанд

Насанд хүрэгчдийн дундаж тунгаар хэрэглэнэ.

Бөөрний үйл ажиллагааны өөрчлөлттэй өвчтөн

Насанд хүрэгчдийн дундаж тунгаар хэрэглэнэ. 

Эмчилгээний үйлчлэл хэр түргэн илрэх вэ?

Үтрээний мөөгөнцөр:

Таны биеийн байдал хэдэн өдрийн дотор сайжирч эхлэх ба зарим эмэгтэйд сайжрал 1 өдрийн дотор илэрсэн талаар тэмдэглэгдсэн байдаг.

Хэрэв таны биеийн байдал хэдэн өдрийн дотор сайжрахгүй бол эмчлэгч эмчдээ хандаарай.

Эр бэлэг эрхтний мөөгөнцөр:

Таны биеийн байдал хэдэн өдрийн дотор сайжирч эхлэх боловч энэ нь 7 хоног хүртэлх хугацаанд  үргэлжилж болно.

Хэрэв таны биеийн байдал нэг долоо хоногийн дотор сайжрахгүй бол эмчлэгч  эмчдээ хандаарай.

Хэрэв Флукона-Денк 150  бэлдмэлийн тунг хэтрүүлсэн тохиолдолд

Бүрээст шахмалыг нэг удаад хэт  олныг хэрэглэсний улмаас танд сөрөг нөлөө илэрч болно. Энэ тохиолдолд эмчдээ болон ойролцоох эмнэлэгт хандана уу. Тун хэтэрсэн тохиолдолд сонсох, харах, мэдрэхүйн зүгээс шинж илэрч болзошгүй бөгөөд хийсвэр бодол (хий юм үзэгдэх, зан төрх өөрчлөгдөх) төрж болно.

Шинж тэмдгийн эмчилгээг (шаардлагатай үед ходоод угаах болон дэмжих эмчилгээ) хийх нь тохиромжтой болно.

Хэрэв Флукона-Денк 150  бэлдмэлийг хэрэглэхээ мартсан тохиолдолд

Хэрэв та эм хэрэглэх цагтаа бэлдмэлийг хэрэглэхээ мартаж өнгөрөөсөн бол санасан даруйдаа хэрэглэнэ. Мартаж өнгөрөөсөн тунг нөхөхийн тулд бэлдмэлийн давхарлаж хэрэглэж болохгүй.

Бэлдмэлийг хэрэглэхтэй холбоотой нэмэлт асуулт гарвал эмчлэгч эмч, эм зүйчээс лавлана уу.